الأدوية الأكثر شيوعا فى المجتمع هى الأدوية الموجودة فى كل بيت زى المضادات الحيوية و مسكنات الآلم و كمان الفيتامينات و المعادن
أكيد كلنا سألنا نفسنا هى مشكلة “مقاومة البكتيريا للمضادات الحيوية” مسئولية الطبيب البشرى و لا الطبيب البيطرى و لا الإثنين مع بعض؟
و أكيد أنت جاوبت بكل ثقة “مسئولية الإثنين مع بعض”
صح طبعاً…
بس فيه مسئول آخر مهم جداً مش لازم ننساه
و هو أنك كمان مسئول معانا ويمكن كمان مسئوليتك أكبر
تفتكروا الدواء الثانى اللى حنتكلم عليه فى الندوة هيكون عن إيه !!؟؟
هيبقى عن دواء كلنا دايما بنستخدمه و موجود معانا حتى فى جيبنا و شنطتنا لأى ألم أو إلتهاب فى جسمنا
طبعا إنتوا عرفتوا إننا هنتكلم عن مسكنات الآلم ومضادات الإلتهاب.
وهنعرف أن زى مالها فوايد لها كمان أضرار و لها إحتياطات عند إستخدامها.
وكمان الفيتامينات مثل فيتامين أ و ب و ج و المعادن زى الحديد و الكالسيوم و الزنك هل نقص أو زيادة تناولها ممكن يعرضنا لمشاكل صحية.
و بعض الفيتامينات و التى استخدمت بكثرة خصوصا للوقاية من فيروس كورونا هل عادة إستخدام الفيتامينات و المعادن بشكل يومى مفيدة ولا الإكثار منها ممكن يسبب أضرار ؟؟
إزاى يعنى؟
هنقول كل حاجة فى الندوة بإذن الله باللغة العربية و التى تهدف لرفع وعى فئات مختلفة من المجتمع إللى هشرفونا بالحضور علشان هدفنا هو صحة المواطن المصرى
الفئة المستهدفة من الندوة هم السادة الزملاء أعضاء الجهاز الإدارى بالجامعة و ممكن كمان طلاب الفرقة الأولى لو حابين ينورونا..
الندوة سوف تنعقد بأذن الله بقاعة المستشفى الجامعى يومى الأحد و الإثنين ١٧ و ١٨ يوليو الساعة العاشرة صباحا..
